Bunachar na saothar aistriúcháin a rinneadh agus a dhéanfar go Gaeilge agus ón nGaeilge atá sa suíomh seo go príomha. Agus breis agus 1600 saothar sa bhunachar cheana féin, feictear a bhisiúla a bhí agus atá an t-aistriú litríochta sa Ghaeilge. Áis iontach a bheidh ann do dhaoine le Gaeilge ar mian leo a fháil amach an bhfuil a rogha leabhair le fáil i nGaeilge, nó don aistritheoir ar mian leis nó léi saothar a aistriú ar ar mhaith leis nó léi a fháil amach ar tugadh faoi cheana féin nó an bhfuil duine eile ag obair air, nó don taighdeoir a bheadh ag iarraidh taighde a dhéanamh ar ilghnéitheacht an aistriúcháin litríochta.
Chomh maith leis an mbunachar, tarraingeofar le chéile léirmheasanna a rinneadh ar shaothair aistriúcháin mar ábhar spéise agus mar threoir do léitheoirí.
Beidh deis ag aistritheoirí, freisin, blaiseadh de shathaor atá idir lámha acu a chur ar fáil d'fhonn spéis a chothú, aiseolas a lorg nó poiblíocht a dhéanamh.
Foilseofar an nuacht is déanaí i saol an aistriúcháin litríochta Ghaeilge, chomh maith.
Tá súil againn go gcothófar pobal bisiúil aistritheoirí agus léitheoirí, go spreagfar daoine tabhairt faoi shaothar litríochta a chur ar fáil i nGaeilge, go ngríosfar daoine chun na saothair aistrithe a léamh agus go dtarraingeofar aird ar an obair iontach atá aistritheoirí litríochta a dhéanamh ar son na teanga.
- Foireann an togra (ó chlé): Kevin Scannell, Séamus Ó Coileáin, Seathrún Ó Tuairisg
